A mellora da seguridade peonil e da accesibilidade serán os obxectivos prioritarios das obras da segunda fase do Pos + Adicional 2/2024, cuxo importe ascende a 702.407,83 euros. Tal e como se aprobou hoxe, 29 de agosto, no pleno, os fondos provinciais destinaranse a dous proxectos centrados en mellorar a conectividade e avanzar na eliminación dos déficits urbanos, facilitando o uso dos espazos públicos a todos os veciños e veciñas.

A proposta contou cos votos favorables de Unión x Cambre, PP, PSOE e Alternativa dos Veciños e a abstención do BNG.

O primeiro proxecto contempla a pavimentación de beirarrúas na mazá M-3 da Barcala, coa finalidade de mellorar tanto a accesibilidade como a seguridade na zona como o resolver humidades en rochos dos edificios. Deste xeito, exponse realizar o revestimento das beirarrúas na rúa Río Mero, Río Miño e Río Mandeo, así como na praza Amador e Daniel. Realizarase, igualmente, á instalación de recollida de pluviais, de equipamento urbano (alcorques, vexetación, bancos, papeleiras…) e, por último, á colocación de varandas que se adapten á normativa actual.

No respectivo ao segundo proxecto, contémplase a mellora da accesibilidade á praza Casares Quiroga, na Barcala, para, así, garantir a non discriminación no acceso e na utilización deste espazo público así como evitar humidades en rochos da edificación. Para iso, faise necesario demoler as beirarrúas existentes e repoñelas cun novo pavimento de formigón, mellorando notablemente o aspecto e a funcionalidade de todo este espazo.

O concelleiro de Urbanismo, Obras e Servizos, Juan González Leirós, asegurou que se trata “de dúas actuacións fundamentais para continuar coas melloras de accesibilidade no noso termo municipal e evitar, deste xeito, que sigan existindo barreiras que supoñen unha discriminación no acceso e a utilización de determinados lugares públicos”.

Festivos locais para 2025

Durante a sesión fixáronse, ademais, os festivos locais para 2025. En primeira instancia, e tal e como figuraba na orde do día, propuxéronse o martes de Entroido, 4 de marzo, e o día de San Roque, 16 de agosto.

Ante a urxencia de aprobar a proposta, pois de non enviala aos órganos competentes antes do 1 de setembro teríanse que establecer os mesmos que neste ano, o Bloque Nacionalista Galego presentou unha moción de urxencia para declarar como festivos locais en 2025 o martes de Entroido, 4 de marzo, e o 24 de xuño, San Xoán, defendendo o arraigamento desta festividade na comunidade.

Tras aprobar, por unanimidade, a urxencia da cuestión, a moción saíu aprobada cos votos en contra de UxC e Alternativa dos Veciños e a favor do BNG, PSOE e PP.