As persoas con discapacidade ou incapacidade laboral de Cambre poderán acceder a un servizo de emprego 100% gratuíto. Esta prestación, que estará dispoñible a partir do 12 de abril, xorde por mor do acordo entre o Concello e a Confederación Galega de Persoas con Discapacidade (COGAMI). O concelleiro de Educación e Sanidade, Miguel Ángel Gutiérrez, sinala os “beneficios” desta colaboración, apuntado que as persoas con discapacidade poderán “acceder a este servizo sen sequera saír do municipio, evitando desprazarse ata as instalacións centrais de COGAMI na Coruña”.

O Concello cedeu o uso dos locais municipais situados na rúa Río Miño n.º 6, na urbanización A Barcala. A partir do 12 de abril, unha técnica de inserción desprazarase os tres primeiros mércores de cada mes para atender aos usuarios e usuarias, que poderán acceder con cita previa. As solicitudes poden facerse a través do teléfono 981 23 11 05.

O servizo de emprego de COGAMI busca favorecer a inclusión das persoas con discapacidade no mercado laboral. Para conseguilo, ofrécese intermediación, orientación e prospección ás persoas con certificado oficial de discapacidade ou de incapacidade laboral para a profesión habitual da Seguridade Social.

Esta prestación conta con preto de 50 profesionais de orientación laboral e axentes de emprego e atende a persoas tanto das zonas urbanas como dos municipios rurais de Galicia. No caso de Cambre, a orientadora laboral, Yolanda Grandal, será a encargada de atender ás persoas usuarias. Actualmente, hai 167 persoas rexistradas na bolsa de emprego (105 homes e 62 mulleres).