O Concello instalará novos equipamentos deportivos en sete instalacións e dependencias ao aire libre. O contrato de subministración do novo mobiliario adxudicouse, esta mañá, por preto de 17.000 euros, e supoñerá a dotación de elementos nos seguintes recintos: pistas polideportivas exteriores de Meixigo, Castros do Bosque (Cecebre), O Souto (Sigrás), nos campos de fútbol Dani Mallo, Lendoiro (A Barcala) e Os Pinares (Brexo-Lema) e no polideportivo de Anceis.
A través da adxudicación, o Concello incrementará as prestacións nestas áreas colocando, para iso, o seguinte mobiliario:
- Un elemento biosaudable tipo surf (para traballar cuádriceps e xemelgos, por exemplo, e para mellorar a flexibilidade e da cadeira e columna vertebral) en Meixigo.
- Dous elementos tipo esquí de fondo ou elíptica (para mellorar a mobilidade dos membros superiores e inferiores, así como a flexibilidade das articulacións) en Meixigo e Castros do Bosque.
- Subministración dun xogo de dúas canastras en Castros do Bosque.
- Subministración de barra de flexións tipo francesa calistenia (para mellorar a forza dos músculos das costas, bíceps, tríceps, ombreiros, peito e extensión de bonecas e dedos) en Castros do Bosque.
- Subministración dunha mesa de tenis de mesa no polideportivo de Anceis.
- Dous xogos de canastras no Souto.
- Seis cepillos limpabotas con soporte galvanizado nos campos de fútbol Dani Mallo, Lendoiro (A Barcala) e Os Pinares (Brexo-Lema).
Os elementos biosaudables e a barra de reflexións tripla francesa irán acompañados dunha placa e/o cartel explicativo coas instrucións e recomendacións de uso.
