O Concello conmemorará o Día da Muller cun completo programa de actividades moi vinculadas ao ámbito da saúde e o exercicio físico. O programa, que incluirá xornadas e obradoiros, celebrarase ao longo de todo o mes e arrincará o vindeiro venres, 10 de marzo, ata o sábado, día 25.

A programación arrincará a próxima semana na Casa da Cultura Vila Concepción. A instalación acollerá o venres, 10 de marzo, de 19.00 a 20.30 horas a xornada ‘Coidados do piso pélvico nas diferentes etapas da muller’. Ao día seguinte, sábado 11 (12.00 a 13.30 horas), será o taller ‘Coidado e exercicios para coidar e protexer o piso pélvico’.

O venres, 17 de marzo (19.00 a 20.30 horas), organizarase a xornada ‘Nutrición e saúde nas diferentes etapas da muller’, tamén en Vila Concepción. O sábado, día 18, será a quenda do taller ‘Recursos prácticos para unha nutrición non centrada no peso’ (de 12.00 a 13.30 horas en Vila Concepción).

O programa concluirá os días 24 e 25 de marzo con dous talleres: ‘Saúde e exercicio físico nas diferentes etapas da muller’ (24 de marzo, de 19.00 a 20.30 horas) e ‘Preparación física na muller para a saúde (25 de marzo de 12.00 a 13.30 horas). Estas dúas últimas iniciativas terán lugar no Complexo Deportivo da Barcala.

As persoas interesadas poderán inscribirse ata o día antes do inicio de xornada. Para iso, deberán presentar a solicitude inscrición nos rexistros do Concello. As mulleres terán preferencia á hora de anotarse.