Cambre restrinxirá desde hoxe, xoves 22 de setembro, o uso de fontes ornamentais e elementos similares. Esta é unha das medidas que o Concello adoptará como acción preventiva polo risco de seca. Atendendo ás indicacións e recomendacións da Xunta, elaborouse un bando municipal no que se especifican as diferentes medidas a adoptar na situación de escaseza de choivas actual.
Ademais da restrición do consumo en fontes, o documento recolle as seguintes directrices: eliminación do baldeo de rúas para a súa limpeza, redución das regas públicas e privadas, evitar o lavado de coches e vehículos industriais e o control do consumo nos edificios e instalacións municipais. Por último, a curto prazo, exponse a elaboración dunha auditoría da rede de saneamento para a detección de infiltracións, así como doutra para revisar posibles fugas na rede de abastecemento.
Estas directrices están acompañadas dunha serie de recomendacións dirixidas a toda a cidadanía. Así, recoméndaselles aos veciños e veciñas reducir as tarefas de lavado de coches e de rega de hortas, a optimización de recursos na rega e en gandería, revisión de posibles fugas en baños e cociñas, o uso racional da auga no aseo persoal, utilización dos electrodomésticos con carga completa e a revisión das últimas facturas e comparativa con trimestres similares.
