O Concello mellorará a funcionalidade da zona verde situada nas inmediacións de rúa Polígono. As obras, que se financiarán con cargo ao Plan Único da Deputación, contan cun orzamento de 184.978,05 euros. A contía servirá para mellorar unha zona de 3.658 metros cadrados que, na actualidade, transmite a sensación de espazo residual. As actuacións servirán, precisamente, para recuperar o atractivo deste espazo e consolidalo así como unha zona verde máis do Temple. A idea é que funcione como punto de encontro e esparexemento para os veciños e veciñas.

As obras centraranse na reordenación do espazo libre configurando novos itinerarios e zonas de axardinamento. Para conseguir estes obxectivos, acometeranse varias tarefas: desmonte dos elementos existentes (sinais, farois, peches e mobiliario urbano), destoconado das árbores afectadas, demolición de bordos, arquetas e pavimentos, formación de firme granular con saburra artificial e de diversos pavimentos, renovación da rede de abastecemento, pluviais e iluminación pública, plantación de novas árbores, instalación de mobiliario urbano e creación dunha área canina.

A disposición dun espazo canino nesta zona resultou gañadora nunha das últimas edicións do proceso participativo Decidámolo Xuntos.