O Concello celebrará mañá, xoves 21 de setembro, ás 12.00 horas un pleno extraordinario no que o goberno local expoñerá a súa proposta de obras a financiar co POS+ 2023 da Deputación da Coruña. A intención do goberno local é dedicar 725.812,54 euros á execución de tres proxectos: ordenación e humanización do espazo público na contorna do apeadeiro de Cecebre, reforma do parque infantil da rúa Francisco Rodríguez e a mellora funcional do paseo dous Templarios.

O alcalde, Óscar García Patiño, apunta que estas intervencións teñen algo en común: “deixan entrever a nosa aposta decidida por crear espazos nos que a veciñanza teña un maior protagonismo, dotando as rúas de máis árbores, mellorando a accesibilidade, a seguridade viaria e eliminando as barreiras arquitectónicas”.

No caso do apeadeiro de Cecebre, os traballos supoñerán xerar unha beirarrúa segura e accesible na zona do apeadeiro, habilitando, ademais, prazas de aparcadoiro. O Concello construirá unha franxa peonil que dará acceso ao centro social, ao parque e ás pistas de Cecebre. O proxecto inclúe, así mesmo, a realización das seguintes tarefas: urbanización da praza e os accesos ao local social, colocación de novo mobiliario urbano (bancos e papeleiras), mellora do firme, plantación de árbores, execución de canalizacións para soterrar instalacións de telecomunicacións e iluminación, así como da rede separativa para recollida de pluviais e fecais e substitución da tubaxe da rede de abastecemento existente.

No parque Francisco Rodríguez, as obras supoñerán a renovación e a mellora do espazo verde, a instalación de mobiliario urbano, a renovación do pavimento de caucho e os xogos infantís e a instalación dun cartel informativo na área infantil.

Por último, o goberno propón financiar a mellora dun primeiro tramo do paseo dos Templarios con fondos provinciais. Con este último proxecto, o goberno local responderá a unha demanda trasladada polos propios veciños e veciñas a través do proceso participativo. Nesta primeira fase actuarase nun tramo de 179,4 metros. As intervencións centraranse na mellora integral do pavimento actual e reconfigurar os distintos espazos de axardinamento e elementos de mobiliario urbano.