O hotel de insectos de Casa Arrigada abre as súas portas da man dos máis novos

18 Xan 2023

Tamén che pode interesar

Os insectos teñen un trato preferente en Cambre. Tanto é así, que estes animais contan xa co seu propio hotel, instalado en Casa Arrigada grazas ao traballo dos máis novos. Trátase dunha das actividades que a Oficina Municipal de Información Xuvenil (OMIX) organizou como parte do seu programa de actividades, e que implicou varios días de traballo por parte dos e as participantes.

A etapa previa á elaboración do hotel consistiu na recollida dos elementos para dar forma a esta construción. Nesta fase, os mozos e mozas fixeron provisión de piñas, paus, cortizas e pedras, materiais procedentes do paseo fluvial do río Mero, localizado a poucos metros da casa da mocidade. A construción ideada polos mozos expúñase con seis palés colocados un encima do outro. A intención era que cinco deles estivesen repletos dos elementos recolleitos no paseo fluvial, mentres que o último, estaría ocupado por unha xardineira na que cultivar plantas aromáticas como malva e ruda.

No primeiro día de traballo comezáronse as tarefas de vernizado e lixado dos palés. Con estes elementos xa secos e lisos, a actividade continuou co enchido dos mesmos cos materiais naturais recolleitos. O último paso foi a elección da localización do hotel, que debía situarse nunha zona próxima a áreas axardinadas, cunha maior incidencia solar e evitando o contacto directo co chan.

Entre os beneficios desta construción destacan a protección de especies como, por exemplo, crisopas, avespas e abellas, a facilitación da polinización das plantas, o control da presenza de pragas e, en definitiva, o mantemento e conservación do ecosistema.