Os alumnos e alumnas de 5º e 6º de Primaria do CEIP Wenceslao Fernández Flórez tomaron posesión como concelleiros e concelleiras da corporación municipal. O Concello acolleu, esta mañá, a celebración de dous plenos infantís nos que os estudantes tiveron ocasión de ocupar os postos dos partidos representados no pleno, así como os da interventora e secretaria municipal. Durante a sesión, a alcaldesa, María Pan, deulles a benvida, explicándolles o funcionamento da administración local, en xeral, e deste órgano colexiado, en particular.

Os recentemente nomeados edís aproveitaron a ocasión para exporlle á rexedora as súas consultas e preguntas. Entre elas, os pequenos e pequenas interesáronse por saber se a Pan Lesta gustáballe ocupar o cargo de alcaldesa de Cambre. Os pequenos aproveitaron a ocasión, ademais, para formular as súas peticións e demandas. Desta forma, solicitaron a execución das beirarrúas na zona do Apeadeiro de Cecebre, a mellora da área infantil do Parque da Igrexa e tamén dalgúns campos de fútbol. A rexedora tomou nota de todas elas, comprometéndose a estudar aquelas de competencia municipal e a trasladar as que dependesen doutros organismos e administracións, como no caso das beirarrúas de Cecebre.

Durante a sesión, o alumnado mostrou así mesmo a súa preocupación por outros temas como, por exemplo, as condutas incívicas relacionadas co mal uso dos contedores. A primeira edil sinalou aos nenos e nenas como “pezas fundamentais e como claves para que no futuro se poidan erradicar este tipo de condutas”.