Se tivésedes que reconstruír a casa da mocidade, por onde empezariades? Esta é unha das preguntas ao redor das que se expuxo o Faite Oír! da OMIX de Cambre. Unha proposta coa que a Oficina Municipal de Información Xuvenil buscou crear un espazo participativo no que os máis novos puidesen formular as súas propostas para a programación e para as instalacións xuvenís. Por medio de preguntas, xogos de mímica, tarxetas e a elaboración dun mural, preto de medio centenar de persoas tiveron a oportunidade de expresar as súas ideas.

En liñas xerais, os usuarios e usuarias coincidiron en pedir máis actividades en grupo e que implicasen saír fóra do termo municipal. Ao longo das dinámicas, expuxeron propostas como paintball, lásertag, pádel, así como excursións a parques de atraccións e mesmo viaxes ao estranxeiro. Os mozos interesáronse tamén polos talleres de cociña que xa se organizan, de forma regular, desde o departamento, solicitando novas accións para aprender a elaborar patacas bravas, sushi, galegas, filloas, donuts, e pratos de Nadal.

En canto á organización de iniciativas novas, destacaron algunhas sobre habilidades para o día a día: métodos de relaxación, control de emocións e ansiedade, métodos de estudo, linguaxe corporal e taller de RCP, entre outras temáticas.

Zona de intercambio de libros

Os usuarios tiveron a ocasión, ademais, de formular unha lista de desexos cos materiais dos que lles gustaría dispoñer nas dependencias. Neste punto xurdiron ideas como a disposición de novos xogos de mesa, a compra dunha videoconsola ou a creación dunha pequena biblioteca ou zona de intercambio de libros, entre outras.

Sentimentos

Os mozos tiveron a oportunidade de explicar que significan para eles as casas da mocidade. Neste punto, os mozos e mozas empregaron palabras como “diversión”, “sentimento” e “todo gratuíto” para referirse a estas instalacións. Outros indicaron que, para eles, Casa Arrigada e Casa dás Palmeiras convértense nun sitio “para facer amigos”, como un “punto de información de aprendizaxe e diversión” e como “un segundo fogar”.

A concelleira de Xuventude, Ana Rodríguez, e o edil de Desenvolvemento Socioeconómico, Diego Alcantarilla, participaron na dinámica grupal cos mozos e mozas e agradeceron a súa “implicación e entusiasmo, claves para seguir mellorando a oferta xuvenil”.