Os Reis Magos apalabran a súa cita co Concello e prometen un percorrido por todas as parroquias

10 Dec 2022

Os Reis Magos apalabraron xa a súa cita en Cambre e prometen un circuíto completo por todas as parroquias. A cita real será o xoves, día 5 de xaneiro, ao longo de todo o día. Así o confirman As súas Maxestades de Oriente, que se mostraron “felices” de poder reencontrarse, de novo, cos nenos e nenas do municipio. Nos dous últimos anos, a crise sanitaria da covid-19 impediu que a visita dos monarcas se realizase con normalidade. En 2023, os Reis confirmaron que volverán ao formato habitual, coñecendo aos pequenos e pequenas de todo o municipio.

Pola mañá, visitarán todas as parroquias. Farano en coches clásicos, parando nalgúns dos puntos de referencia de cada zona. Pola tarde, está prevista a realización de dúas Cabalgatas: unha no Temple (que sairá desde o CEIP Portofaro) e outra en Cambre (que partirá desde o Muíño da Barcala, nas inmediacións da asociación La Promesa) e outra en Ou Temple. Con respecto a outros anos, procurarase minorar o ritmo das Cabalgatas para que os nenos e nenas poidan gozar, durante máis tempo, da visita dos Reis Magos.

Unha vez conclúan os itinerarios, haberá recepcións reais nos pavillóns de Graxal e no Sofía Toro. Nese momento, os pequenos e pequenas terán tempo para formular os seus desexos aos monarcas e poderán gozar, ademais, dunha cunca de chocolate quente.

O concelleiro de Cultura, Deportes e Xuventude, Daniel Mallo, celebra que esta cita “tan especial e máxica poida retomarse tras dous anos especialmente duros”.

No 2020, o Concello tivo que apostar por un servizo de videochamada coas súas Maxestades debido á crise sanitaria. No 2021, os Reis Magos non faltaron á súa cita con Cambre, pero leváronse a cabo Cabalgatas estáticas para garantir o cumprimento das medidas sanitarias.

Tamén che pode interesar