Os Reis Magos volverán a Cambre. O reencontro das súas Maxestades de Oriente cos nenos e nenas será este venres, 5 de xaneiro, e prolongarase toda a xornada. Así o confirmaron os propios monarcas, indicando que, pola mañá, realizarán un percorrido matinal por todas as parroquias, mentres que pola tarde, tomarán parte na clásica Cabalgata, que pasará polo Temple, A Barcala e Cambre.

O circuíto matinal arrincará ás 8.45 horas e a liña de saída será a propia Casa do Concello. Subidos nun coche clásico, os Reis Magos partirán desde aí e farán paradas nalgúns dos puntos de referencia de cada zona. Co obxectivo de que os veciños e veciñas poidan saber a hora de chegada dos Reis, o Concello habilitará unha ligazón na páxina web para coñecer a localización exacta na que se atopan.

Pola tarde, está prevista a realización da Cabalgata, que percorrerá tanto O Temple como A Barcala e Cambre. A saída desde O Temple será, aproximadamente, ás 17.00 horas. Ao redor das 18.45 horas está previsto que os monarcas partan desde A Barcala, percorran algunhas das rúas da urbanización e se dirixan en dirección a Cambre.

Unha vez conclúa o itinerario, haberá recepcións reais nos pavillóns do Temple Graxal e no Sofía Toro. Nese momento, os pequenos e pequenas terán tempo para formular os seus desexos aos monarcas.

Durante as recepcións, todos os nenos e nenas recibirán un boleto para participar nun sorteo de agasallos. Este ano, rifaranse dúas bicicletas e dous patinetes entre as dúas recepcións. As persoas gañadoras anunciaranse a través das redes sociais municipais.

A Cabalgata e as recepcións reais estarán supeditadas á climatoloxía. En caso de alerta vermella, ambas as actividades terán que cancelarse. En caso de producirse unha alerta climatolóxica de menor nivel, o Concello manterá as recepcións nos pavillóns municipais.