A sexta edición do Cromático Mural Fest comezará o vindeiro luns, 24 de xullo. Ese día, algúns dos artistas participantes comezarán a elaborar as súas obras nos muros do municipio. Con todo, o festival ofrece outras actividades complementarias para veciños e veciñas de todas as idades. Na proposta, destaca a realización dun muro colaborativo na rúa Río Miño da Barcala. A iniciativa está aberta a toda a cidadanía, que terá ocasión de deixar o seu sinal artístico nun dos muros da urbanización.

A actividade levarase a cabo nunha gran parede situada entre os números 1 e 3 da rúa Río Miño. Celebrarase os días 27, 28 e 29 de xullo de 10.00 a 13.00 horas e de 17.00 a 20.00 horas. A proposta estará dirixida pola educadora, mediadora e tallerista, Viviana Luccisano, e polo artista Spogo. Ambos guiarán ás persoas participantes, dándolles consellos e pautas para tomar parte nesta iniciativa creativa.

O concelleiro de Cultura, David Saborido, apunta que o obxectivo é “achegar esta disciplina artística á veciñanza, implicándoos, ademais, no coidado da súa contorna e facéndoos parte do embelecemento das zonas urbanas”.

As persoas interesadas poderán apuntarse nas casas da mocidade, a través da páxina web omix.cambre.es ou durante a celebración desta actividade.

Outras propostas

Como en convocatorias anteriores, o programa incluirá tamén accións de formación. Por unha banda, realizarase unha masterclass de muralismo xeométrico a cargo de Spogo (entre o 24 e o 26 de xullo na urbanización A Barcala). Polo outro, Viviana Luccisano impartirá un taller de iniciación á arte urbana en Casa Arrigada. Esta proposta terá lugar tamén entre o 24 e o 26 de xullo.

O venres, 28 de xullo, levarase a cabo unha visita guiada polos murais da sexta edición. As persoas que participen poderán coñecer, non só as obras desta sexta edición, senón tamén a algúns dos seus autores.

As persoas interesadas en anotarse nalgunha destas actividades poderán facelo a través da páxina web omix.cambre.es.