Óscar García Patiño repetirá como alcalde do Concello de Cambre. O rexedor encara con “ilusión e ganas dos oito últimos anos” o que será o seu “último mandato”, tal e como explicou durante a sesión de investidura. No pleno postuláronse o candidato de Unión x Cambre, Óscar García Patiño, a candidata do PP, Diana Piñeiro, e o candidato do PSOE, Diego Alcantarilla, que solicitou realizar a votación para a elección de forma secreta. Tanto Unión x Cambre como o PP votaron en contra deste método de votación. Desta forma, ao non alcanzarse o apoio necesario, a votación fíxose de forma nominal. O candidato de UxC alcanzou os 7 votos a favor dos membros do seu grupo; Diana Piñeiro conseguiu os cinco do PP e, por último, Diego Alcantarilla logrou o apoio do seu partido, así como o do BNG e Alternativa dos Veciños. Ao non alcanzar ningunha das candidaturas a maioría absoluta necesaria, prevaleceu a lista máis votada, resultando alcalde Óscar García Patiño. O  rexedor aproveitou a ocasión para darlles a benvida aos novos concelleiros que conformarán a corporación entre 2023 e 2027, aos que animou a sumarse a un traballo conxunto “colaborando man a man e antepoñendo os intereses de Cambre aos de calquera dous partidos representados neste pleno para que os proxectos importantes se fagan realidade”. García Patiño enumerou, neste punto, a importancia de seguir avanzando na tramitación do Plan Xeral de Ordenación Municipal (PXOM), na apertura do novo auditorio de Cambre, na extensión da rede de saneamento en todas as parroquias e na construción de máis quilómetros de sendas peonís no municipio.