O Concello pechará este domingo, 10 de decembro, o prazo de solicitude do programa de axudas Consolida Cambre. Trátase dunha liña de subvencións coas que se busca promover a consolidación de proxectos empresariais no municipio. A liña de 2023 conta cunha dotación orzamentaria de 80.000 euros, 20.000 máis que no exercicio anterior. Con respecto a 2022, as contías máximas a percibir polos beneficiarios pasarán de 1.100 a 2.500 euros.
En canto aos posibles destinatarios, poderán optar a estas axudas: persoas individuais ou socios de micropemes ou pemes que se desen de alta na Seguridade Social entre o 1 de xaneiro de 2020 e o 31 de decembro de 2021 e que continúen de alta na data de publicación do extracto da convocatoria.
A contía máxima a conceder a cada persoa ou entidade beneficiaria non poderá superar os 2.500 euros. Esta axuda servirá para cubrir as cotas correspondentes do pago á seguridade social no Réxime especial de Traballadores/as por conta propia ou Autónomos/as (RETA) ou nalgunha mutualidade dos colexios profesionais correspondente aos 18 primeiros meses de actividade.
A tramitación destas axudas poderá realizarse, exclusivamente, por vía telemática a través da sede electrónica, no apartado de subvencións, axudas e premios.
