O castro de Cambre foi conquistado, esta mañá, por unha primeira avanzada de romanos. As tropas estaban conformadas polos alumnos e alumnas da escola infantil A Fraga Encantada, que se desprazaron ata a zona do Museo Arqueolóxico de Cambre e ao castro para facer unha primeira inspección do terreo. Os pequenos romanos foron recibidos polo alcalde, Óscar García Patiño, e polo concelleiro de Turismo e Patrimonio, Ramón Boga.

Os nenos e nenas foron caracterizados con traxes confeccionados por eles mesmos a través de materiais reciclados. Por exemplo, para elaborar os colares baleiraron e aplanaron cápsulas de café, dándolles forma de chapa e uníndoas ata formar o colgante.

Ao comezo da visita, os nenos e nenas recibiron unha pequena explicación sobre o pasado de Cambre, así como sobre os vestixios que os romanos deixaron no municipio e que se atopan no Museo Arqueolóxico. A continuación, desprazáronse ata o castro, onde completaron a invasión da vila de Cambre.

Todo antes do arranque da Galaicoi, que terá lugar mañá, venres 14 de xullo, a partir das 17.00 horas. Prevese que o inicio das hostilidades entre os castrexos e os romanos comece ás 17.30 horas.