Cambre publicou, esta mañá, a convocatoria para cubrir catro prazas da Policía Local. Estes postos, de escala básica, ocuparanse por comisión de servizos. Desta forma, estas vacantes cubriranse así ata a provisión definitiva das mesmas, por un período máximo dun ano e prorrogable por outro máis. A previsión do goberno local é incluír estas catro e outra máis por medio da Oferta Pública de Emprego do Concello.

Actualmente, hai seis prazas vacantes na Policía Local. Catro delas producíronse, recentemente, tras o traslado de efectivos a outros corpos. Ante esta situación, o Concello formulou unha consulta á Dirección Xeral de Emerxencias e á Academia Galega de Seguridade Pública na que se preguntaba polas diferentes posibilidades para cubrir estas prazas. Na súa resposta, desde estas administracións apuntouse que a comisión de servizos era a vía adecuada para facelo.

O concelleiro de Seguridade Cidadá, Daniel Mallo, incide en que esta convocatoria “é esencial para garantir o mellor servizo á cidadanía”. O edil explica que a seguridade cidadá “segue a ser unha prioridade para este goberno, polo que estamos a dar todos os pasos necesarios para cubrir estas prazas á maior brevidade, e a fórmula máis áxil é a comisión de servizos, tal e como nos indicaron desde a administración competente”.

Os axentes que queiran concorrer á convocatoria deberán ter a condición de persoal funcionario de carreira. As persoas candidatas terán que pertencer á escala básica, categoría de Policía Local, subgrupo de clasificación profesional C1 e atoparse en situación de servizo activo.

As solicitudes poderán presentarse por medio do rexistro electrónico do Concello nun prazo de dez días hábiles. Desta forma, poderán presentar a documentación entre o 15 e o 29 de decembro.

Bases da convocatoria para a provisión en comisión de servizos de catro postos de Policía Local