VISITAR Cambre, entrar en Cambre, significa entrar nun mundo marabilloso, inmerso nas raíces máis profundas da historia, a arte e a natureza, onde tradición e modernidade danse a man dunha maneira insólitamente armoniosa.
Os atractivos turísticos, para quen visita Cambre, son moitos e variados: en todas as parroquias pódense atopar elementos singulares de arquitectura civil e relixiosa (igrexas, pazos, vilas ou quintas), etnográfica (fontes, cruceiros), construcións tradicionais, así como variados e agradables espazos naturais (bosques, ría, río e encoro).
Para aqueles que queiran perderse polos camiños tradicionais de Cambre, dámosvos unha breve información daqueles elementos que é probable que se crucen no voso camiño. Para aqueles viaxeiros curiosos son estas liñas, palabras que pretenden axudar a comprender a paisaxe natural e humano do noso Concello, paisaxes que aínda poden sorprender. Sen dúbida, tras visitar tanto os maiores como os máis humildes recursos, ningún viaxeiro quedará indiferente.
